ಸರ್ಕಾರಿ ಹಾಗೂ ಅನುದಾನಿತ ಶಾಲೆಗಳ ಮಕ್ಕಳ ಕಲಿಕಾ ಗುಣಮಟ್ಟದಕ್ಕೆ ಆದ್ಯತೆ ನೀಡುತ್ತಿರುವ ಶಾಲಾ ಶಿಕ್ಷಣ ಮತ್ತು ಸಾಕ್ಷರತೆ ಇಲಾಖೆಯು ಅಂಕಪಟ್ಟಿಗಷ್ಟೇ ಮಕ್ಕಳ ಪ್ರಗತಿ ಮಾಪನವನ್ನು ಸೀಮಿತಗೊಳಿಸುವ ಬದಲು ಅವರ ಸರ್ವತೋಮುಖ ಬೆಳವಣಿಗೆಯನ್ನು ಬಿಂಬಿಸುವ ʻಸಮಗ್ರ ಪ್ರಗತಿ ಪತ್ರʼ ನೀಡುವ ಯೋಜನೆಯನ್ನು ಈ ಶೈಕ್ಷಣಿಕ ಸಾಲಿನಿಂದಲೇ ಜಾರಿಗೆ ತಂದಿದೆ. ರಾಜ್ಯ ಶಿಕ್ಷಣ ಸಂಶೋಧನೆ ಮತ್ತು ತರಬೇತಿ ಇಲಾಖೆ ಈ ʻಸಮಗ್ರ ಪ್ರಗತಿ ಪತ್ರʼವನ್ನು ಸಿದ್ಧಪಡಿಸಿದ್ದು, ವಿದ್ಯಾರ್ಥಿಗಳ ಕಲಿಕೆ, ಆಸಕ್ತಿ, ಓದು, ನಡವಳಿಕೆ ಮತ್ತಿತರಗಳ ಮಾಹಿತಿ ಇದರಲ್ಲಿ ಇರಲಿದೆ.